बाळासाहेब पवार यांना 'लोकमत गौरव पुरस्कार' जाहीर

बाळासाहेब पवार यांना 'लोकमत गौरव पुरस्कार' जाहीर

महाराष्ट्र 24 न्यूज नेटवर्क 

13 जुलै 2026

प्रतिनिधी :

शिक्षण, सामाजिक कार्य आणि ग्रामीण भागातील विद्यार्थ्यांच्या सर्वांगीण विकासासाठी गेली अनेक वर्षे सातत्याने कार्यरत असलेले संत नामदेव शिक्षण प्रसारक मंडळाचे अध्यक्ष बाळासाहेब पवार यांना यंदाचा 'लोकमत गौरव पुरस्कार' जाहीर झाला आहे. त्यांच्या उल्लेखनीय कार्याची दखल घेत लोकमत समूहाच्या वतीने हा सन्मान प्रदान करण्यात येणार आहे.

सन १९९८ पासून शिक्षण क्षेत्रात कार्यरत असलेल्या बाळासाहेब पवार यांनी शिक्षणापासून वंचित राहणाऱ्या ग्रामीण व आर्थिकदृष्ट्या दुर्बल विद्यार्थ्यांना शिक्षणाच्या मुख्य प्रवाहात आणण्यासाठी विशेष प्रयत्न केले. त्यांच्या नेतृत्वाखाली संस्थेने गुणवत्तापूर्ण शिक्षणाबरोबरच विद्यार्थ्यांना स्पर्धा परीक्षा, रोजगार व व्यक्तिमत्त्व विकासासाठी विविध उपक्रम राबविले. त्यांच्या मार्गदर्शनामुळे अनेक विद्यार्थी आज विविध सरकारी विभागांमध्ये अधिकारी व कर्मचारी म्हणून कार्यरत आहेत.

संत नामदेव शिक्षण प्रसारक मंडळाच्या माध्यमातून शिक्षण क्षेत्रात केलेल्या उल्लेखनीय कार्यामुळे संस्थेचे जिल्हाभरातून कौतुक होत असून, समाजातही संस्थेची वेगळी ओळख निर्माण झाली आहे. शिक्षणाबरोबरच सामाजिक उपक्रम, जनजागृती, गरजू विद्यार्थ्यांना मदत, तसेच विविध समाजोपयोगी कार्यातही बाळासाहेब पवार नेहमीच अग्रेसर राहिले आहेत.

लोकमत समूहाच्या वतीने आयोजित करण्यात आलेल्या विशेष गौरव सोहळ्यात बाळासाहेब पवार यांचा मान्यवरांच्या हस्ते सन्मान करण्यात येणार आहे. या कार्यक्रमाला खासदार रामराव वडकुते, जिल्हा परिषदेचे मुख्य कार्यकारी अधिकारी विवेक गायकवाड, जिल्हाधिकारी राहुल गुप्ता तसेच पोलीस अधीक्षक श्रेणिक लोढा यांची प्रमुख उपस्थिती राहणार असून, त्यांच्या हस्ते बाळासाहेब पवार यांना 'लोकमत गौरव पुरस्कार' प्रदान करण्यात येणार आहे.

शिक्षण आणि सामाजिक क्षेत्रातील त्यांच्या दीर्घकालीन योगदानाचा गौरव म्हणून जाहीर झालेल्या या पुरस्काराबद्दल विविध स्तरांतून बाळासाहेब पवार यांच्यावर अभिनंदनाचा वर्षाव होत आहे.