हिंगोली दौऱ्यात आयुक्त संजय काटकर यांचा 'आशा' स्वयंसेविकांशी आपुलकीचा संवाद

हिंगोली दौऱ्यात आयुक्त संजय काटकर यांचा 'आशा' स्वयंसेविकांशी आपुलकीचा संवाद

महाराष्ट्र 24 न्यूज नेटवर्क 

16जुलै 2026

हिंगोली,  ग्रामीण आरोग्य व्यवस्थेचा कणा मानल्या जाणाऱ्या आशा' स्वयंसेविकांच्या कार्याचा प्रत्यक्ष आढावा घेत त्यांच्या अडचणी जाणून घेण्यासाठी आयुक्त आरोग्य सेवा तथा अभियान संचालक (राष्ट्रीय आरोग्य अभियान) मा. श्री. संजय काटकर यांनी हिंगोली जिल्ह्याच्या शासकीय दौऱ्यादरम्यान दाखविलेली संवेदनशीलता आणि साधेपणा विशेष ठरला. रस्त्यावर कार्यरत असलेल्या आशा स्वयंसेविका दिसताच त्यांनी स्वतःचे वाहन थांबवून त्यांच्याशी थेट संवाद साधला. वरिष्ठ प्रशासकीय अधिकाऱ्याचा हा अनौपचारिक, आत्मीय आणि लोकाभिमुख संवाद उपस्थित आशा स्वयंसेविका व आरोग्य कर्मचाऱ्यांसाठी प्रेरणादायी ठरला.

दौऱ्यादरम्यान श्री. काटकर यांनी आशा स्वयंसेविकांकडून गावपातळीवर राबविण्यात येणाऱ्या विविध आरोग्य उपक्रमांची सविस्तर माहिती घेतली. माता व बाल आरोग्य सेवा, नियमित लसीकरण, गर्भवती महिलांची नोंद व पाठपुरावा, नवजात बालकांची काळजी, संसर्गजन्य व असंसर्गजन्य आजारांचे सर्वेक्षण, आरोग्य जनजागृती, कुटुंब नियोजन, तसेच नागरिकांना वेळेत आरोग्य सुविधा उपलब्ध करून देण्यासाठी आशा स्वयंसेविका, आरोग्य सेविका, बहुउद्देशीय आरोग्य कर्मचारी आणि प्राथमिक आरोग्य केंद्रांमध्ये कसा समन्वय साधला जातो, याबाबत त्यांनी सखोल चर्चा केली.

यावेळी आशा स्वयंसेविकांनी आपल्या कामातील अडचणी, अनुभव, सूचना आणि क्षेत्रात सेवा देताना येणाऱ्या विविध आव्हानांची माहितीही आयुक्तांना दिली. श्री. काटकर यांनी प्रत्येक बाब संयमाने ऐकून घेत संबंधित समस्यांबाबत सकारात्मक भूमिका व्यक्त केली. त्यांच्या सहज, मनमोकळ्या आणि आत्मीय संवादामुळे आशा स्वयंसेविकांमध्ये समाधानाचे वातावरण निर्माण झाले.

राज्याच्या सर्वोच्च आरोग्य प्रशासनातील वरिष्ठ अधिकारी स्वतः रस्त्यावर थांबून तळागाळातील कर्मचाऱ्यांशी संवाद साधत असल्याचे दृश्य अनेकांसाठी सुखद आश्चर्य ठरले. प्रशासकीय दडपणाऐवजी माणुसकी, संवेदनशीलता आणि कार्यकर्त्यांच्या योगदानाचा सन्मान या मूल्यांना प्राधान्य देणारी त्यांची कार्यशैली यावेळी अधोरेखित झाली.

तळागाळातील आरोग्य व्यवस्था प्रत्यक्ष पाहणे, क्षेत्रीय कर्मचाऱ्यांच्या सूचना जाणून घेणे आणि त्यांच्या कार्याची दखल घेणे ही श्री. संजय काटकर यांची कार्यपद्धती असल्याचे या भेटीतून स्पष्ट झाले. ग्रामीण आरोग्य सेवा अधिक सक्षम आणि लोकाभिमुख करण्यासाठी प्रत्यक्ष क्षेत्रभेटी व संवादाला त्यांनी दिलेले महत्त्व आरोग्य विभागातील कर्मचाऱ्यांसाठी प्रेरणादायी ठरले.

आशा स्वयंसेविका या ग्रामीण आरोग्य व्यवस्थेचा मजबूत पाया असून त्यांच्या मनोबलात वाढ करण्यासाठी वरिष्ठ अधिकाऱ्यांनी अशा प्रकारे प्रत्यक्ष क्षेत्रात जाऊन संवाद साधणे ही अत्यंत सकारात्मक बाब असल्याची भावना उपस्थितांनी व्यक्त केली. सार्वजनिक आरोग्य विभागाची गुणवत्तापूर्ण, लोककेंद्रित आणि विश्वासार्ह आरोग्य सेवा तळागाळापर्यंत पोहोचविण्याची कटिबद्धता या भेटीतून पुन्हा एकदा अधोरेखित झाली.

हिंगोली जिल्ह्यातील या दौऱ्याने आयुक्त श्री. संजय काटकर यांच्या साधेपणा, लोकाभिमुख नेतृत्व, संवेदनशील प्रशासन आणि कर्तव्यनिष्ठ कार्यपद्धतीची प्रभावी झलक अनुभवायला मिळाली. वरिष्ठ अधिकारी आणि तळागाळातील आरोग्य कर्मचारी यांच्यातील विश्वास, संवाद आणि समन्वय अधिक दृढ करण्यासाठी अशा भेटी महत्त्वपूर्ण ठरत असल्याचे मत आरोग्य क्षेत्रातून व्यक्त होत आहे.