हिंगोली जिल्ह्यात मध्यरात्री भूकंपाचे धक्के; परभणी व नांदेडमध्येही हादरे, नागरिकांच्या झोपा उडाल्या

हिंगोली जिल्ह्यात मध्यरात्री भूकंपाचे धक्के; परभणी व नांदेडमध्येही हादरे, नागरिकांच्या झोपा उडाल्या

महाराष्ट्र 24न्यूज नेटवर्क 

हिंगोली, दि. ९ जुलै : हिंगोली जिल्ह्यासह परभणी आणि नांदेड जिल्ह्यात बुधवारी पहाटे १ वाजून ३७ मिनिटांनी भूकंपाचे धक्के जाणवले. मध्यरात्री अचानक झालेल्या हादऱ्यांमुळे नागरिकांच्या झोपा उडाल्या. अनेकांनी घाबरून तातडीने घराबाहेर धाव घेतली. काही ठिकाणी नागरिकांनी रस्त्यावर आणि मोकळ्या जागेत थांबणे पसंत केले.

भूकंपाच्या भीतीने नागरिक ठाण मांडून  रस्त्यावर 

जिल्हा आपत्ती व्यवस्थापन कक्षाकडून प्राप्त प्राथमिक माहितीनुसार, भूकंपाचा केंद्रबिंदू हिंगोली जिल्ह्यात असून त्याची तीव्रता ४.६ रिश्टर स्केल इतकी नोंदविण्यात आली आहे. या भूकंपाचे धक्के हिंगोलीसह परभणी आणि नांदेड जिल्ह्याच्या अनेक भागांत जाणवल्याने काही काळ भीतीचे वातावरण निर्माण झाले.

प्राथमिक अहवालानुसार या भूकंपात कोणतीही जीवित अथवा वित्तहानी झाल्याची नोंद नाही. कोणतीही इमारत कोसळल्याची किंवा मोठे नुकसान झाल्याची माहितीही प्रशासनाकडे प्राप्त झालेली नसल्याचे सांगण्यात आले. महसूल, आपत्ती व्यवस्थापन आणि स्थानिक प्रशासनाच्या यंत्रणांनी तत्काळ परिस्थितीचा आढावा घेत विविध भागांतील माहिती संकलित करण्यास सुरुवात केली.

भूकंपाचे धक्के जाणवताच अनेक नागरिकांनी एकमेकांना फोन करून सुरक्षिततेची खात्री करून घेतली. काही ठिकाणी नागरिकांनी घराबाहेर येऊन बराच वेळ थांबणे पसंत केले. विशेषतः लहान मुले, ज्येष्ठ नागरिक आणि महिलांमध्ये भीतीचे वातावरण दिसून आले.

दरम्यान, जिल्हा प्रशासनाने नागरिकांना अफवांवर विश्वास न ठेवण्याचे, शांत राहण्याचे आणि अधिकृत माहितीलाच प्राधान्य देण्याचे आवाहन केले आहे. कोणतीही आपत्कालीन परिस्थिती उद्भवल्यास तात्काळ स्थानिक प्रशासन किंवा आपत्ती व्यवस्थापन यंत्रणेशी संपर्क साधण्याचेही आवाहन करण्यात आले आहे.

भूकंपाचे धक्के सौम्य स्वरूपाचे असले तरी मध्यरात्री झालेल्या या घटनेमुळे नागरिकांमध्ये काही काळ चिंतेचे वातावरण निर्माण झाले. प्रशासनाकडून परिस्थितीवर सातत्याने लक्ष ठेवण्यात येत असून अधिकृत अहवालाची प्रतीक्षा आहे.