पाच वर्षाखालील सर्व बालकांना पोलिओचा डोस पाजून
भारत पोलिओ मुक्त करण्यास सहकार्य करावे
- जिल्हाधिकारी जितेंद्र पापळकर
हिंगोली : जिल्ह्यातील सर्व गावांतील नागरिकांनी जवळच्या पोलिओ लसीकरण केंद्रावर जाऊन आपल्या पाच वर्षाखालील सर्व बालकांना पोलिओचा डोस पाजावा व भारत पोलिओ मुक्त करण्यास सहकार्य करावे, असे आवाहन जिल्हाधिकारी जितेंद्र पापळकर यांनी केले.
येथील जिल्हा सामान्य रुग्णालयात आमदार तान्हाजी मुटकुळे आणि जिल्हाधिकारी जितेंद्र पापळकर यांच्या हस्ते बालकांना पोलिओचा डोस पाजून जिल्हास्तरीय उद्घाटन करण्यात आले. यावेळी जिल्हा शल्यचिकित्सक डॉ. राजेंद्र सुर्यवंशी, निवासी वैद्यकीय अधिकारी डॉ. गोपाल कदम, बालरोग तज्ज्ञ डॉ. दीपक मोरे, डॉ. नंदिनी भगत, जिल्हा कार्यक्रम अधिकारी उध्दव कदम, तालुका आरोग्य अधिकारी डॉ.नामदेव कोरडे यांची प्रमुख उपस्थिती होती.
यावेळी बोलताना जिल्हाधिकारी श्री. पापळकर म्हणाले, जिल्ह्यातील 1 लाख 27 हजार 748 बालकांना पोलिओचा डोस पाजण्यात येणार आहे. यासाठी 1175 बूथची स्थापना करण्यात आली असून यासाठी 3128 कर्मचाऱ्यांची नियुक्ती करण्यात आली आहे. आपल्या नजीकच्या लसीकरण केंद्रावर जाऊन आपल्या पाल्यांना पोलिओचा डोस पाजावा, असे आवाहन केले.
या कार्यक्रमास जिल्हा रुग्णालयातील अधिकारी, कर्मचारी, परिचारिका, नागरिक उपस्थित होते.
****
टिप्पणी पोस्ट करा