शासकीय रुग्णालयातील आयसीयु कक्ष रिकामेच; उपकरणे ठेवली गुंडाळुन...!
हिंगोली प्रतिनिधी
येथील शासकीय रुग्णालयाच्या आयसीयू कक्षातील उपकरणे वापराअभावी धुळखात पडली असून, कक्षातील बेडवरही धूळ चढली आहे. त्यामुळे आयसीसू कक्षच आजारी असल्याचे दिसू लागले आहे. आता हा कक्ष कधी सुरू होणार याची प्रतीक्षा रुग्णांच्या नातेवाईकांना लागली आहे.
हिंगोली येथील शासकीय रुग्णालयात हिंगोली तालुक्यासह सेनगाव व औंढा नागनाथ तालुक्यातील रुग्ण उपचारासाठी येतात. रुग्णालयात विविध आजाराचे दररोज किमान ४०० ते ५०० रुग्ण उपचारासाठी येतात. त्यापैकी काही जणांवर उपचार करून घरी पाठवले जाते तर काही जणांना रुग्णालयात दाखल करुू घेतले जाते. यामध्ये काही गंभीर आजारी रुग्णांचीही समावेश आहे. या रुग्णांसाठी रुग्णालयात आयसीसू कक्ष असणे आवश्यक आहे. मात्र, रुग्णालयात कक्षच नसल्याने गंभीर आजारी रुग्णांच्या अडचणीत मोठी वाढ झाली आहे.
दरम्यान, मागील काही दिवसांत रुग्णांचे प्रमाण वाढू लागले आहे. तर अपघातामध्ये जखमी होणार्‍या रुग्णांचेही प्रमाण अधिक असून गंभीर आजारी रुग्णांसाठी शासकीय रुग्णालयात आयसीयू कक्षच नाही. त्यामुळे हृदयविकार, व इतर गंभीर आजार असलेल्या रुग्णांवर शासकीय रुग्णालयात प्राथमिक उपचार करुन पुढील उपचारासाठी नांदेडला हलवले जात आहे. त्यामुळे रुग्ण व त्यांच्या नातेवाईकांना आर्थिक भुर्दंड व मानसिक त्रास सहन करावा लागत आहे.
सध्या रुग्णालयाच्या आयसीसू कक्षाची केवळ पाटीच असून, आतमधील बेडवर मोठी धूळ चढली आहे. या कक्षातील बीपी मॉनीटर मशीन, बायपॅप मशीन, व्हेंटीलेटर व इतर उपकरणे चक्क गुंडाळून ठेवण्यात आली आहेत. त्यामुळे लाखो रुपयांची यंत्र धुळखात आहेत. आता हिंगोलीच्या रुग्णालयात आयसीयू कक्ष कधी सुरु होणार याची प्रतिक्षा रुग्णांच्या नातेवाईकांना लागली आहे.
टिप्पणी पोस्ट करा