हिंगोलीत जुगार अड्ड्यावर पोलिसांचा छापा; 18 जणांवर गुन्हा
रोख रकमेसह क्रेटा कार, आठ दुचाकी व 15 मोबाईल जप्त; तब्बल 18 लाख 47 हजार 20 रुपयांचा मुद्देमाल पोलिसांच्या ताब्यात
महाराष्ट्र 24 न्यूज नेटवर्क
06सप्टेंबर 2026
हिंगोली : हिंगोली शहरातील एनटीसी परिसरातील तापडिया इस्टेट येथे सुरू असलेल्या कथित बेकायदेशीर जुगार अड्ड्यावर हिंगोली शहर पोलिसांनी छापा टाकून 18 जणांविरुद्ध महाराष्ट्र जुगार प्रतिबंधक अधिनियमाच्या कलम 4 व 5 अन्वये गुन्हा दाखल केला आहे. या कारवाईत पोलिसांनी 2 लाख 16 हजार 20 रुपये रोख, एक क्रेटा कार, आठ मोटारसायकली, 15 मोबाईल फोन आणि 52 पत्ते असा एकूण 18 लाख 47 हजार 20 रुपयांचा मुद्देमाल जप्त केला आहे.
पोलिसांनी दिलेल्या माहितीनुसार, शनिवार, 5 सप्टेंबर रोजी सायंकाळी साडेपाच वाजण्याच्या सुमारास हिंगोली शहरातील एनटीसी येथील दोस्ती मित्र मंडळ चॅरिटेबल ट्रस्ट, एनटीसी तापडिया इस्टेट येथील अजय नागरे यांच्या कॉम्प्लेक्समधील पत्र्याच्या गाळ्यात हा जुगार सुरू असल्याची माहिती मिळाल्यानंतर पोलिसांनी पंचांसमक्ष छापा टाकला.
या कारवाईदरम्यान अब्दुल जावेद अब्दुल हमीद (42, रा. खडकपुरा, हिंगोली) आणि निनाजी दशरथ कांडेलकर (46, रा. रिसाला बाजार, हिंगोली) हे विनापरवाना
कथितरित्या जुगार अड्डा चालवत असल्याचे पोलिसांच्या कारवाईत समोर आल्याचे नमूद करण्यात आले आहे. ते स्वतःच्या फायद्यासाठी 'झन्ना मन्ना' नावाचा पत्त्यांचा जुगार खेळवत असल्याचा पोलिसांचा आरोप आहे. यावेळी अन्य 16 जण जुगार खेळताना आढळून आल्याचे पोलिसांनी सांगितले.
रोख रकमेसह वाहनांचा समावेश
छाप्यात जुगाराच्या डावातील 2 लाख 16 हजार 20 रुपये रोख रक्कम पोलिसांना मिळून आली. याशिवाय MH 38 AK 1130 क्रमांकाची क्रेटा कार, अंदाजे आठ मोटारसायकली आणि 15 मोबाईल फोन जप्त करण्यात आले. घटनास्थळावरून 52 पत्ते देखील ताब्यात घेण्यात आले आहेत. जप्त मुद्देमालाची एकूण किंमत 18 लाख 47 हजार 20 रुपये असल्याचे पोलिसांनी नमूद केले आहे.
18 जणांविरुद्ध गुन्हा
या प्रकरणात अब्दुल जावेद अब्दुल हमीद, निनाजी दशरथ कांडेलकर, विनोद दत्तराव पांढरे, फारुक बेग खालीद बेग, निलेश पंडीत देशमुख, दिनकर लिंबाजी वांगर, मदनलाल गंगाप्रसाद जैरस्वाल, गजानन सोपान गिते, मनोज विश्वनाथ गायकवाड, सुनील सुदाम लोखंडे, संतोष बळीराम कांदे, नागोराव जनार्धन काळे, शिवाजी राजाराम कठारे, आकाश कैलास तारे, धनाजी रामकिशन दहातोंडे, सतीष नामदेवराव मुसळे, नसीर खान नवाज खान आणि विठ्ठल परसराम काळे यांचा आरोपी म्हणून समावेश आहे.
या प्रकरणी सहायक पोलीस उपनिरीक्षक संजय लक्ष्मण मार्के यांनी फिर्याद दिली. त्यानुसार 6 सप्टेंबर 2026 रोजी पहाटे 2.41 वाजता गुन्हा दाखल करण्यात आला.
वरिष्ठ अधिकाऱ्यांच्या मार्गदर्शनाखाली कारवाई
ही कारवाई पोलीस अधीक्षक श्री. श्रेणिक लोढा आणि उपविभागीय पोलीस अधिकारी श्री. देशमुख यांच्या मार्गदर्शनाखाली करण्यात आली. पोलीस निरीक्षक देवेंद्रसिंह ठाकुर, आयजी उमाप यांच्या पथकातील पोलीस उपनिरीक्षक इंगळे, सहाय्यक पोलीस निरीक्षक बनसोडे तसेच इतर पोलीस कर्मचाऱ्यांनी या कारवाईत सहभाग घेतला.
जुगार अड्ड्यावर करण्यात आलेल्या या कारवाईमुळे हिंगोली शहरातील अवैध जुगाराच्या प्रकारांवर पोलिसांनी कारवाईचा बडगा उगारल्याचे दिसून येत असून, या प्रकरणाचा पुढील तपास पोलीस करीत आहेत.
إرسال تعليق