अवैध धंद्यांची माहिती लपविणे भोवले; तीन पोलिस पाटील निलंबित
एसडीओंचे आदेश; कळमनुरी उपविभागात कारवाईने पाटलाचे अवसान गळाले
महाराष्ट्र 24 न्यूज नेटवर्क
01सप्टेंबर 2026
कळमनुरी : गावातील अवैध धंदे, गुन्हेगारी स्वरूपाच्या हालचाली तसेच कायदा व सुव्यवस्थेशी संबंधित घटनांची माहिती पोलिस प्रशासनाला वेळेत न दिल्याचा ठपका ठेवत कळमनुरी उपविभागातील तीन पोलिस पाटलांवर निलंबनाची कारवाई करण्यात आली आहे. उपविभागीय पोलिस अधिकारी यांच्या अहवालाच्या आधारे उपविभागीय दंडाधिकारी प्रतीक्षा भुते यांनी ३१ ऑगस्ट रोजी निलंबनाचे आदेश जारी केले. या कारवाईमुळे पोलिस पाटील यंत्रणेत खळबळ उडाली आहे.
विश्वनाथ देवबाराव जाधव (धानोरा जहागीर), पांडुरंग दादाराव भुरके (कोंढूर) आणि भागवत दत्तराव करडखेले (वाकोडी) या तिघा पोलिस पाटलांवर ही कारवाई करण्यात आली आहे.
अवैध धंद्यांची माहिती देणे पोलिस पाटलांचे कर्तव्य
गावपातळीवर पोलिस प्रशासन आणि स्थानिक नागरिक यांच्यातील महत्त्वाचा दुवा म्हणून पोलिस पाटलांची भूमिका अत्यंत महत्त्वाची मानली जाते. गावात सुरू असलेले अवैध व्यवसाय, गुन्हेगारी प्रवृत्तीच्या व्यक्तींच्या हालचाली, कायदा व सुव्यवस्थेला बाधा पोहोचविणाऱ्या घटना तसेच संभाव्य गुन्ह्यांची माहिती संबंधित पोलिस यंत्रणेला वेळेत देणे अपेक्षित असते.
मात्र, संबंधित पोलिस पाटलांनी गावातील अवैध धंद्यांबाबतची माहिती पोलिस प्रशासनापर्यंत पोहोचविण्यात निष्काळजीपणा केल्याचे उपविभागीय पोलिस अधिकाऱ्यांच्या अहवालातून निदर्शनास आले. त्यानंतर या प्रकरणाची गंभीर दखल घेत उपविभागीय दंडाधिकाऱ्यांनी निलंबनाची कारवाई केली.
अहवालानंतर प्रशासनाची कठोर भूमिका
अवैध धंद्यांना आळा घालण्यासाठी पोलिस प्रशासनाकडून कारवाई केली जात असताना गावपातळीवरून वेळेत माहिती उपलब्ध होणे अत्यावश्यक असते. पोलिस पाटील हे प्रशासनाचे स्थानिक पातळीवरील महत्त्वाचे प्रतिनिधी असल्याने त्यांच्याकडून माहिती दडपली जाणे अथवा निष्काळजीपणा होणे ही बाब प्रशासनाने गांभीर्याने घेतली आहे.
उपविभागीय पोलिस अधिकाऱ्यांनी सादर केलेल्या अहवालानंतर उपविभागीय दंडाधिकारी प्रतीक्षा भुते यांनी उपलब्ध बाबींची दखल घेत तिघांवर निलंबनाची कारवाई केली.
पोलिस पाटील यंत्रणेला इशारा
गावातील अवैध व्यवसायांवर नियंत्रण ठेवण्यासाठी स्थानिक पातळीवर माहितीचे जाळे मजबूत असणे आवश्यक आहे. अशा परिस्थितीत पोलिस पाटलांकडूनच अवैध धंद्यांची माहिती झाकून ठेवण्याचा किंवा ती प्रशासनापासून दूर ठेवण्याचा प्रयत्न होत असल्याचे आढळल्यास तो गंभीर प्रकार ठरतो.
कळमनुरी उपविभागातील या कारवाईमुळे कर्तव्यात कसूर करणाऱ्या पोलिस पाटलांना प्रशासनाने स्पष्ट इशारा दिल्याचे मानले जात आहे. तीन पोलिस पाटलांवर एकाचवेळी झालेल्या निलंबनाच्या कारवाईमुळे परिसरात चर्चेला उधाण आले असून, गावागावातील अवैध धंद्यांबाबत प्रशासन आता अधिक सतर्क होणार असल्याचे चित्र आहे.
तीन पोलिस पाटलांवर कारवाई
१) विश्वनाथ देवबाराव जाधव — धानोरा जहागीर
२) पांडुरंग दादाराव भुरके — कोंढूर
३) भागवत दत्तराव करडखेले — वाकोडी
या तिघांवर उपविभागीय दंडाधिकारी प्रतीक्षा भुते यांच्या आदेशानुसार निलंबनाची कारवाई केल्याने पोलीस पाटलांचे अवसान गळाले
टिप्पणी पोस्ट करा