औंढा शहरात गणेश विसर्जनासाठी तगडा पोलीस बंदोबस्त
ड्रोन कॅमेऱ्याद्वारे नजर; २ एसआरपीएफ प्लाटूनसह ९ अधिकारी, ५५ पोलीस कर्मचारी व ४९ होमगार्ड तैनात
महाराष्ट्र 24 न्यूज नेटवर्क
24 सप्टेंबर 2026
औंढा नागनाथ : गणेशोत्सवाच्या पार्श्वभूमीवर औंढा शहरासह संपूर्ण तालुक्यात गणेशमूर्ती विसर्जनासाठी पोलीस प्रशासनाकडून कडेकोट सुरक्षा व्यवस्था करण्यात आली आहे. विसर्जन मिरवणुकीदरम्यान कोणताही अनुचित प्रकार घडू नये, तसेच कायदा व सुव्यवस्था अबाधित राहावी यासाठी ड्रोन कॅमेऱ्याद्वारे संपूर्ण परिसरावर नजर ठेवण्यात येणार असून मोठा पोलीस बंदोबस्त तैनात करण्यात आला आहे.
औंढा शहरातील १२ मानाचे गणपती तसेच शहरातील एकूण २५ गणेशमूर्तींचे विसर्जन होणार आहे. या पार्श्वभूमीवर शहरातील हर हर तलाव येथे गणेशमूर्ती विसर्जनाची व्यवस्था करण्यात आली आहे. तर संपूर्ण औंढा तालुक्यात तब्बल २१५ गणेशमूर्तींचे विसर्जन होणार असल्याने पोलीस प्रशासनाने सुरक्षेच्या दृष्टीने विशेष नियोजन केले आहे.
२ एसआरपीएफ प्लाटूनसह मोठा बंदोबस्त
गणेश विसर्जनाच्या पार्श्वभूमीवर औंढा शहरात २ एसआरपीएफ प्लाटून, ९ पोलीस अधिकारी, ५५ पोलीस कर्मचारी आणि ४९ होमगार्ड असा मोठा बंदोबस्त तैनात करण्यात आला आहे. विसर्जन मार्ग, प्रमुख चौक, तलाव परिसर तसेच गर्दीच्या ठिकाणी पोलिसांकडून विशेष लक्ष ठेवण्यात येणार आहे.
ड्रोन कॅमेऱ्याच्या माध्यमातून विसर्जन मिरवणूक आणि गर्दीच्या ठिकाणांवर देखरेख ठेवण्यात येणार असून, संवेदनशील भागात अतिरिक्त पोलीस बंदोबस्त ठेवण्यात आला आहे.
पोलीस अधिकाऱ्यांच्या मार्गदर्शनाखाली नियोजन
पोलीस अधीक्षक श्रीनिक लोढा यांच्या आदेशाने आणि पोलीस निरीक्षक शामकुमार डोंगरे यांच्या मार्गदर्शनाखाली औंढा तालुक्यात गणेश विसर्जनासाठी सुरक्षा व्यवस्थेचे नियोजन करण्यात आले आहे.
या बंदोबस्तामध्ये API आयुब शेख, पोलीस उपनिरीक्षक इंगोले, रवी हरकाळ, ज्ञानेश्वर सावळे, पाटील, अमोल चव्हाण आणि महेश गरजे यांच्यासह पोलीस अधिकारी व कर्मचारी सहभागी राहणार आहेत.
मुख्य रस्त्यावरील अतिक्रमणे हटवली
दरम्यान, गणेश विसर्जन मिरवणुकीला अडथळा निर्माण होऊ नये आणि वाहतुकीची कोंडी टाळता यावी, यासाठी शहरातील मुख्य रस्त्यावरील अतिक्रमणे हटविण्यात आली आहेत. १९८७ पासून रस्त्यालगत असलेल्या अतिक्रमणांवरही कारवाई करण्यात आल्याने विसर्जन मिरवणुकीसाठी मार्ग मोकळा करण्यात आला आहे.
विसर्जन मिरवणुकीदरम्यान नागरिकांनी पोलिसांना सहकार्य करावे, गर्दीच्या ठिकाणी अनावश्यक थांबू नये आणि प्रशासनाने दिलेल्या सूचनांचे पालन करावे, असे आवाहन पोलीस प्रशासनाकडून करण्यात आले आहे.
गणेशोत्सव शांततेत आणि उत्साहात पार पडावा, यासाठी पोलीस प्रशासनाने व्यापक सुरक्षा आराखडा तयार केला असून औंढा शहरासह संपूर्ण तालुक्यात विसर्जनाच्या काळात पोलिसांचा कडक पहारा राहणार आहे.
टिप्पणी पोस्ट करा