हिंगोलीत १७.९० लाखांचा प्रतिबंधित पान मसाला-तंबाखू साठा जप्त
स्कॉर्पिओसह एक आरोपी पोलिसांच्या ताब्यात ग्रामीण पोलिसांची कारवाई
महाराष्ट्र 24 न्यूज नेटवर्क
हिंगोली, दि. १९ सप्टेंबर २०२६ : महाराष्ट्र शासनाने प्रतिबंधित केलेला पान मसाला आणि तंबाखूची अवैध वाहतूक करणाऱ्या वाहनावर हिंगोली ग्रामीण पोलिसांनी कारवाई करत तब्बल १७ लाख ९० हजार ५३० रुपयांचा मुद्देमाल जप्त केला. या कारवाईत प्रतिबंधित पान मसाला, तंबाखू तसेच वाहतुकीसाठी वापरण्यात आलेली स्कॉर्पिओ असा मुद्देमाल पोलिसांनी ताब्यात घेतला. वाहनचालकाला पोलिसांनी ताब्यात घेतले असून, त्याच्यासह अन्य एका आरोपीविरुद्ध गुन्हा दाखल करण्यात आला आहे.
हिंगोली-कळमनुरी मार्गावरील खटकाळी बायपास परिसरात, खुराणा पेट्रोलपंपासमोर शनिवारी (१९ सप्टेंबर) सकाळी साडेआठच्या सुमारास ही कारवाई करण्यात आली. अन्न व औषध प्रशासनाच्या अन्न सुरक्षा अधिकारी राजश्री रामकिशन सावंत यांच्या फिर्यादीवरून हिंगोली ग्रामीण पोलीस ठाण्यात गुन्हा दाखल करण्यात आला आहे.
पान मसाला व तंबाखूचा मोठा साठा
पोलिसांनी दिलेल्या माहितीनुसार, कारवाईदरम्यान तागाच्या पोत्यांमध्ये पांढऱ्या उपपिशव्यांत ठेवलेला केसरयुक्त विमल पान मसाल्याचा साठा आढळून आला. त्यामध्ये ५५ पाउच असलेल्या पाच पिशव्या असून, या मालाची किंमत ६ लाख ५३ हजार ४०० रुपये असल्याचे नमूद करण्यात आले आहे.
तसेच दोन चौकोनी बॉक्समध्ये काळ्या रेक्झीन बॅगमध्ये ठेवलेले रजनीगंधा पान मसाल्याचे २३ बॉक्स आढळले. या मालाची किंमत ९९ हजार ३६० रुपये असल्याचे पोलिसांनी सांगितले.
याशिवाय पांढऱ्या पोत्यांमध्ये व्ही-१ तंबाखूचे पाउच आढळून आले असून, त्याची किंमत २१ हजार ६०० रुपये आहे. तसेच पांढऱ्या लांब दंडगोलाकार पिशव्यांमध्ये व्ही-१ विंग तंबाखूचे पाउच आढळले असून, या मालाची किंमत १६ हजार १७० रुपये असल्याचे पोलिस नोंदीत नमूद आहे.
दहा लाखांची स्कॉर्पिओही जप्त
प्रतिबंधित मालाची वाहतूक करण्यासाठी वापरण्यात आलेली एमएच २६ झेड ५००५ क्रमांकाची पांढऱ्या रंगाची स्कॉर्पिओ पोलिसांनी ताब्यात घेतली. या वाहनाची अंदाजे किंमत १० लाख रुपये असल्याचे नमूद करण्यात आले आहे. पान मसाला, तंबाखू आणि वाहन असा एकूण १७ लाख ९० हजार ५३० रुपयांचा मुद्देमाल या कारवाईत जप्त करण्यात आला.
वाहनचालक पोलिसांच्या ताब्यात
या प्रकरणात शेख लईख शेख अहमद (वय अंदाजे ३८, रा. बिलाल नगर, नांदेड) याच्यावर वाहनचालक म्हणून आरोपी क्रमांक एक म्हणून गुन्हा दाखल करण्यात आला असून, तो सध्या पोलिसांच्या ताब्यात आहे. तर अन्वर उर्फ हाजी हुसेन सय्यद (वय अंदाजे २५, रा. तोफखाना, हिंगोली) याचा आरोपी क्रमांक दोन म्हणून उल्लेख करण्यात आला आहे.
आरोपी क्रमांक दोनच्या सांगण्यावरून आरोपी क्रमांक एक हा प्रतिबंधित पान मसाला व तंबाखूची वाहतूक करीत असल्याचा आरोप फिर्यादीत करण्यात आला आहे. या प्रकरणातील पुढील तपास पोलिसांकडून सुरू आहे.
विविध कलमांन्वये गुन्हा दाखल
या प्रकरणी हिंगोली ग्रामीण पोलीस ठाण्यात गुन्हा दाखल करण्यात आला आहे. आरोपींविरुद्ध भारतीय न्याय संहितेतील कलम १२३, २२३, २७४, २७५, ३(५) तसेच अन्न सुरक्षा व मानके कायदा, २००६ मधील कलम २६, २७, ३०(२)(अ) आणि ५९ अन्वये गुन्हा नोंदविण्यात आला आहे.
पोलीस अधीक्षक श्रनिक लोढा यांच्या आदेशाने
पोलीस निरीक्षक विष्णुकांत गुट्टे यांच्या मार्गदर्शनाखाली तपास सुरू आहे. . कारवाईत पोलीस निरीक्षक मोहन भोसले पोलीस निरीक्षक विष्णुकांत गुट्टे, पोउपनि दिलीप मोरे, पोउपनि राहुल घुले, पोउपनि श्रीदेवी वम्गे यांच्यासह पोलीस कर्मचारी सहभागी झाले होते.
प्रतिबंधित पान मसाला व तंबाखूची वाहतूक रोखण्यासाठी करण्यात आलेल्या या कारवाईत मोठ्या प्रमाणात मुद्देमाल जप्त झाल्याने परिसरात या कारवाईची चर्चा सुरू आहे. जप्त मुद्देमालाच्या स्रोताबाबत तसेच या वाहतुकीमागील अन्य व्यक्तींच्या भूमिकेबाबत तपास सुरू असल्याचे पोलिसांकडून सांगण्यात आले.
टिप्पणी पोस्ट करा