जमीन वादातून शेतकऱ्यावर जीवघेणा हल्ला; चौघांविरुद्ध गुन्हा
मोटारसायकल आडवी लावून धारदार शस्त्राने हल्ला केल्याचा आरोप
महाराष्ट्र 24 न्यूज नेटवर्क
04 ऑक्टोंबर 2026
हिंगोली/सेनगाव : सेनगाव येथील जमिनीच्या वादातून एका ६० वर्षीय शेतकऱ्याचा पाठलाग करून त्याला अडविण्यात आले आणि धारदार शस्त्राने जीवघेणा हल्ला करण्यात आल्याची घटना समोर आली आहे. या प्रकरणी सेनगाव पोलिस ठाण्यात चौघांविरुद्ध भारतीय न्याय संहितेच्या विविध कलमांन्वये गुन्हा दाखल करण्यात आला आहे. यामध्ये दोन आरोपींची नावे निष्पन्न झाली असून, अन्य दोन आरोपी अद्याप अनोळखी आहेत.
पोलिसांनी दिलेल्या माहितीनुसार, गणेशराव तुकाराम जारे (वय ६०, व्यवसाय शेती, रा. जैन मंदिराजवळ, मेन रोड, सेनगाव) यांनी याबाबत फिर्याद दिली आहे. या प्रकरणात पप्पु उर्फ आसराजी चव्हाण (रा. प्रवीणनगर, बळसोंड, हिंगोली) आणि मनोज उर्फ कृष्णकुमार तिवारी (रा. सेनगाव) यांच्यासह दोन अनोळखी व्यक्तींविरुद्ध गुन्हा नोंद करण्यात आला आहे.
राहोली खुर्द फाट्याजवळ अडविले
ही घटना २१ सप्टेंबर २०२६ रोजी दुपारी साडेतीनच्या सुमारास राहोली खुर्द फाट्याच्या पुढे, हिंगोलीच्या पश्चिमेस सुमारे सहा किलोमीटर अंतरावर घडल्याचे पोलिस नोंदीत नमूद आहे. फिर्यादीच्या म्हणण्यानुसार, सेनगाव येथील जमिनीच्या वादातून आरोपी क्रमांक एकने यापूर्वी धमकी दिली होती.
त्यानंतर फिर्यादी हिंगोलीकडे येत असताना आरोपी क्रमांक दोनने त्यांचा छुपा पाठलाग केल्याचा आरोप आहे. पुढे दोन अनोळखी व्यक्तींनी मोटारसायकल वेडीवाकडी चालवत फिर्यादीच्या मोटारसायकलसमोर ती आडवी लावली. त्यामुळे फिर्यादीला मोटारसायकल थांबवावी लागली.
तोंडाला रुमाल बांधून हल्ला
फिर्यादी मोटारसायकल थांबवताच तोंडाला रुमाल बांधलेले दोन अनोळखी इसम त्यांच्या जवळ आले. “१७ सप्टेंबरला सेनगाव पोलिस ठाण्यात आमच्या पप्पु दादाला काय बोलले?” असे म्हणत त्यांनी अश्लील शिवीगाळ केली आणि जीवे मारण्याची धमकी दिल्याचा आरोप फिर्यादीने केला आहे.
यानंतर त्यांच्या हातातील धारदार शस्त्राने फिर्यादीच्या पोटाच्या उजव्या बाजूस तसेच उजव्या हाताच्या बोटावर वार करण्यात आल्याचे तक्रारीत नमूद आहे. या हल्ल्यात फिर्यादी गंभीर जखमी झाल्याचे पोलिसांनी सांगितले.
एमएलसी जबाबावरून गुन्हा दाखल
हल्ल्यानंतर जखमी गणेशराव जारे यांच्यावर उपचार सुरू होते. नांदेड येथील श्री गंगा हॉस्पिटलमध्ये पोलिस उपनिरीक्षक राहुल घुले यांनी त्यांचा जबाब नोंदविला. त्यानंतर ३ ऑक्टोबर २०२६ रोजी सकाळी ११.४३ वाजता सेनगाव पोलिस ठाण्यात एमएलसी जबाबावरून गुन्हा दाखल करण्यात आला.
या प्रकरणी गुन्हा क्रमांक ६२२/२०२६ असून भारतीय न्याय संहितेतील कलम १०९(१), २९६, १२६(२), ३५१(२) आणि ६१(२) अन्वये गुन्हा नोंदविण्यात आला आहे.
तपास सुरू; आरोपी अद्याप अटकेत नाहीत
गुन्ह्याचा तपास पोलिस उपनिरीक्षक राहुल घुले करीत आहेत. पोलिस नोंदीनुसार सध्या कोणत्याही आरोपीला अटक झालेली नाही. घटनास्थळी पोलिस निरीक्षक गुट्टे, पोलिस उपनिरीक्षक राहुल घुले, महिला पोलिस उपनिरीक्षक श्रीदेवी वम्गे आणि पोलिस कर्मचारी गारये यांनी भेट दिली आहे.
पोलिसांनी या प्रकरणाचा तपास सुरू केला असून, हल्ल्यामागील नेमके कारण, आरोपींची भूमिका आणि घटनेत वापरण्यात आलेल्या शस्त्राबाबत पुढील तपासातून माहिती समोर येणार आहे.
टिप्पणी पोस्ट करा