शांतता भंग करणाऱ्या सोशल मीडिया पोस्टवर कडक कारवाईचा इशारा; पोलीस निरीक्षक शामकुमार डोंगरे यांचे नागरिकांना आवाहन

शांतता भंग करणाऱ्या सोशल मीडिया पोस्टवर कडक कारवाईचा इशारा; पोलीस निरीक्षक शामकुमार डोंगरे यांचे नागरिकांना आवाहन

महाराष्ट्र 24 न्यूज नेटवर्क 

27 जुलै 2026 

औंढा (जि. हिंगोली), प्रतिनिधी : समाजात धार्मिक, जातीय तेढ निर्माण करणाऱ्या, अफवा पसरविणाऱ्या तसेच कायदा व सुव्यवस्थेला धोका निर्माण करणाऱ्या सोशल मीडिया पोस्ट करणाऱ्या अथवा अशा पोस्ट फॉरवर्ड करणाऱ्या व्यक्तींवर कठोर कायदेशीर कारवाई करण्यात येणार असल्याचा इशारा औंढा पोलीस स्टेशनचे पोलीस निरीक्षक शामकुमार डोंगरे यांनी दिला आहे.

सोशल मीडियाचा वाढता वापर लक्षात घेता काही समाजकंटकांकडून फेसबुक, व्हॉट्सअॅप, इन्स्टाग्राम, एक्स (ट्विटर) तसेच इतर डिजिटल माध्यमांवर आक्षेपार्ह, भडकावू आणि दिशाभूल करणारे संदेश प्रसारित केले जात असल्याचे निदर्शनास येत आहे. अशा पोस्टमुळे समाजात अशांतता निर्माण होऊन कायदा व सुव्यवस्थेचा प्रश्न निर्माण होण्याची शक्यता असते. त्यामुळे अशा कृत्यांविरुद्ध पोलीस प्रशासनाने कठोर भूमिका घेतली आहे.

पोलीस निरीक्षक शामकुमार डोंगरे यांनी सांगितले की, धार्मिक भावना दुखावणे, जाती-जातींमध्ये वैमनस्य निर्माण करणे, अफवा पसरविणे किंवा सार्वजनिक शांतता भंग होईल अशा प्रकारचे मजकूर, फोटो, व्हिडिओ अथवा संदेश सोशल मीडियावर पोस्ट करणे किंवा फॉरवर्ड करणे हा दंडनीय गुन्हा आहे. अशा प्रकरणांमध्ये संबंधित व्यक्तींविरुद्ध भारतीय न्याय संहिता (BNS) तसेच लागू असलेल्या इतर कायदेशीर तरतुदींनुसार कठोर कारवाई करण्यात येईल. दोषी आढळणाऱ्या व्यक्तींना अटक करून न्यायालयीन प्रक्रिया राबविण्यात येईल.

नागरिकांनी कोणतीही माहिती सत्यता पडताळल्याशिवाय सोशल मीडियावर प्रसारित करू नये. विशेषतः धार्मिक, जातीय किंवा सामाजिक तेढ निर्माण करणारे संदेश, अफवा किंवा भडकावू पोस्ट फॉरवर्ड करणे टाळावे. संशयास्पद किंवा समाजविघातक पोस्ट आढळल्यास त्वरित डायल 112 किंवा औंढा पोलीस स्टेशन येथे संपर्क साधून पोलिसांना माहिती द्यावी, असे आवाहनही त्यांनी केले.

पोलीस प्रशासनाने सर्व नागरिकांना सामाजिक सलोखा, शांतता आणि कायदा-सुव्यवस्था कायम राखण्यासाठी सहकार्य करण्याचे आवाहन केले असून, जबाबदार नागरिक म्हणून सोशल मीडियाचा विवेकपूर्ण वापर करण्याची गरज अधोरेखित केली आहे.

"शांतता राखा, कायद्याचा आदर करा आणि सुरक्षित समाज घडविण्यासाठी पोलिसांना सहकार्य करा," असे आवाहन पोलीस निरीक्षक शामकुमार डोंगरे यांनी केले.