फाळेगाव प्राथमिक आरोग्य केंद्राची जिल्ह्यात अव्वल कामगिरी; 'छत्रपती शिवाजी महाराज महसूल समाधान शिबीर' अभियानात कर्मचाऱ्यांचा गौरव

फाळेगाव प्राथमिक आरोग्य केंद्राची जिल्ह्यात अव्वल कामगिरी; 'छत्रपती शिवाजी महाराज महसूल समाधान शिबीर' अभियानात कर्मचाऱ्यांचा गौरव

महाराष्ट्र 24 न्यूज नेटवर्क 

24 जुलै 2026 

हिंगोली : राज्य शासनाच्या 'छत्रपती शिवाजी महाराज महसूल समाधान शिबीर' अभियानांतर्गत आयोजित विविध आरोग्य शिबिरांमध्ये उत्कृष्ट कामगिरी बजावत फाळेगाव प्राथमिक आरोग्य केंद्राने (PHC) जिल्ह्यात सर्वाधिक गुण मिळवत अव्वल स्थान पटकावले. या उल्लेखनीय यशाबद्दल प्राथमिक आरोग्य केंद्रातील अधिकारी व कर्मचाऱ्यांचा गौरव समारंभ उत्साहात पार पडला.

कार्यक्रमाचे उद्घाटन आमदार तानाजी मुटकुळे यांच्या हस्ते करण्यात आले. यावेळी जिल्हाधिकारी राहुल गुप्ता, जिल्हा परिषदेचे मुख्य कार्यकारी अधिकारी विवेक गायकवाड, जिल्हा आरोग्य अधिकारी डॉ. कैलास शेळके, उपविभागीय अधिकारी समाधान घुटुकडे, तहसीलदार श्रीकांत भुजबळ, तालुका आरोग्य अधिकारी डॉ. गणेश जोगदंड, डॉ. दिवसे,  डॉ दिपके . मंडळ अधिकारी शिल्पा चाटसे यांच्यासह आरोग्य विभागातील अधिकारी व कर्मचारी उपस्थित होते.

फाळेगाव प्राथमिक आरोग्य केंद्राने राष्ट्रीय गुणवत्ता हमी मानांकन (NQAS) प्रक्रियेत जिल्ह्यात सर्वाधिक गुण मिळवत उल्लेखनीय यश संपादन केल्याबद्दल उपस्थित मान्यवरांच्या हस्ते सर्व अधिकारी व कर्मचाऱ्यांचा सत्कार करण्यात आला.

यावेळी आरोग्य सेविका सपना चाटसे (सूर्यतळ) यांच्यासह प्राथमिक आरोग्य केंद्रातील कर्मचारी तसेच विविध गावांतील आशा स्वयंसेविकांचाही गौरव करण्यात आला. आरोग्य सेवा अधिक प्रभावीपणे नागरिकांपर्यंत पोहोचविण्यासाठी आशा स्वयंसेविकांनी दिलेल्या योगदानाचेही मान्यवरांनी कौतुक केले.

कार्यक्रमात बोलताना आमदार तानाजी मुटकुळे यांनी आरोग्य विभागातील अधिकारी, डॉक्टर, परिचारिका, आरोग्य सेविका आणि आशा स्वयंसेविकांनी ग्रामीण भागात दिलेल्या सेवांचे विशेष कौतुक केले. शासनाच्या आरोग्यविषयक योजना प्रभावीपणे राबवून नागरिकांना दर्जेदार आरोग्य सेवा उपलब्ध करून देण्यात फाळेगाव प्राथमिक आरोग्य केंद्राने आदर्श कामगिरी केली असल्याचे त्यांनी सांगितले.

मान्यवरांनी भविष्यातही याच समर्पणाने आणि गुणवत्तेच्या आधारे आरोग्य सेवा अधिक सक्षम करण्याचे आवाहन करत सर्व कर्मचाऱ्यांना शुभेच्छा दिल्या.

ठळक मुद्दे

• 'छत्रपती शिवाजी महाराज महसूल समाधान शिबीर' अभियानांतर्गत विविध आरोग्य शिबिरांचे आयोजन.
• फाळेगाव प्राथमिक आरोग्य केंद्राची NQAS मानांकनात जिल्ह्यात अव्वल कामगिरी.
• उत्कृष्ट कामगिरीबद्दल आरोग्य विभागातील अधिकारी व कर्मचाऱ्यांचा सत्कार.
• आमदार तानाजी मुटकुळे यांच्या हस्ते कार्यक्रमाचे उद्घाटन.
• जिल्हाधिकारी राहुल गुप्ता, सीईओ विवेक गायकवाड, डॉ. कैलास शेळके यांच्यासह वरिष्ठ अधिकारी उपस्थित.
• आरोग्य सेविका सपना चाटसे आणि आशा स्वयंसेविकांच्या कार्याचा गौरव.
• ग्रामीण भागात दर्जेदार आरोग्य सेवा देणाऱ्या आरोग्य कर्मचाऱ्यांचे आमदार मुटकुळे यांच्याकडून विशेष कौतुक.