ऐतिहासिक सार्वजनिक दसरा महोत्सवावर निवडणूक कामांचे सावट; महसूल यंत्रणेवरील ताणामुळे महोत्सव साजरा करणे अशक्य
महाराष्ट्र 24 न्यूज नेटवर्क
4 ऑगस्ट 2026
हिंगोली, प्रतिनिधी : देशातील दुसऱ्या क्रमांकाचा ऐतिहासिक सार्वजनिक दसरा महोत्सव म्हणून ओळख असलेल्या हिंगोलीच्या दसरा महोत्सवावर यंदा निवडणूक प्रक्रियेचे सावट आले आहे. विशेष सखोल मतदार यादी पुनरिक्षण (एसआयआर), ग्रामपंचायत निवडणुका तसेच संभाव्य जिल्हा परिषद व पंचायत समिती निवडणुकांच्या पार्श्वभूमीवर महसूल यंत्रणेवर प्रचंड कामाचा ताण निर्माण झाला असून, या परिस्थितीत सार्वजनिक दसरा महोत्सव २०२६ साजरा करणे शक्य नसल्याचे उपविभागीय अधिकारी तथा सार्वजनिक दसरा महोत्सव समितीचे अध्यक्ष समाधान घुटुकडे आणि तहसीलदार श्रीकांत भुजबळ यांनी जिल्हाधिकारी राहुल गुप्ता यांना पत्राद्वारे कळविले आहे.
हिंगोलीचा सार्वजनिक दसरा महोत्सव राज्यासह देशभरात प्रसिद्ध असून, देशातील दुसऱ्या क्रमांकाचा दसरा महोत्सव म्हणून त्याची ओळख आहे. या महोत्सवातील रामलीला हा मुख्य आकर्षणाचा कार्यक्रम असून, कृषी व औद्योगिक प्रदर्शनीलाही दररोज हजारो नागरिक भेट देतात. विजयादशमीच्या दिवशी होणारा भव्य रावण दहन सोहळा पाहण्यासाठी सुमारे एक लाखांहून अधिक भाविक व नागरिक हिंगोलीत दाखल होतात. त्यामुळे हा महोत्सव जिल्ह्याच्या सांस्कृतिक आणि सामाजिक परंपरेचा अविभाज्य भाग मानला जातो.
सार्वजनिक दसरा महोत्सवाचे आयोजन उपविभागीय अधिकारी यांच्या अध्यक्षतेखाली विविध समित्यांच्या माध्यमातून केले जाते. उपविभागीय अधिकारी आणि तहसीलदार यांच्या मार्गदर्शनाखाली नियोजन, सुरक्षा, वाहतूक, प्रदर्शनी, सांस्कृतिक कार्यक्रम आदींचे व्यवस्थापन केले जाते. मात्र यंदा महसूल प्रशासन पूर्णपणे निवडणूक प्रक्रियेत गुंतले असल्याने महोत्सवाच्या नियोजनासाठी आवश्यक मनुष्यबळ उपलब्ध होणे अशक्य असल्याचे पत्रात नमूद करण्यात आले आहे.
सध्या भारत निवडणूक आयोगाच्या निर्देशानुसार विशेष सखोल मतदार यादी पुनरिक्षण कार्यक्रम सुरू आहे. हिंगोली विधानसभा मतदारसंघात तब्बल २६ हजार ४५५ विसंगतींची पडताळणी तसेच सुमारे १७ हजार अप्राप्त अर्जांवरील कार्यवाही सुरू आहे. या सर्व प्रकरणांवर सुनावणी घेऊन निर्धारित कालमर्यादेत त्यांचे निराकरण करणे आवश्यक आहे. याशिवाय प्रारूप मतदार यादीवरील दावे आणि हरकतींची छाननी करून १९ ऑक्टोबर रोजी अंतिम मतदार यादी प्रसिद्ध करण्याची जबाबदारी महसूल प्रशासनावर आहे.
दरम्यान, राज्य निवडणूक आयोगामार्फत हिंगोली तालुक्यातील ९५ ग्रामपंचायतींच्या निवडणुकीची प्रक्रिया सुरू झाली आहे. या अंतर्गत प्रभाग रचना, प्रभाग आरक्षण, मतदार यादी तयार करणे, दावे-हरकतींची सुनावणी आणि निवडणुकीची पूर्वतयारी अशी अनेक कामे सुरू आहेत. या निवडणुकांमध्ये ७७५ सदस्य आणि ९५ सरपंच निवडून द्यायचे आहेत. त्यामुळे महसूल यंत्रणेवरील जबाबदाऱ्या अधिक वाढल्या आहेत.
याशिवाय राज्य निवडणूक आयोगाने जिल्हा परिषद आणि पंचायत समिती निवडणुकांच्या अनुषंगानेही माहिती मागविण्यास सुरुवात केली आहे. त्यामुळे या निवडणुकाही लवकरच जाहीर होण्याची शक्यता प्रशासनाने व्यक्त केली आहे. या सर्व निवडणूक प्रक्रियांमुळे महसूल यंत्रणेवरील कामाचा ताण अत्यंत वाढला असून, ऐतिहासिक सार्वजनिक दसरा महोत्सवाचे नियोजन आणि आयोजन करणे व्यवहार्य राहणार नसल्याचे पत्रात स्पष्ट करण्यात आले आहे.
या पार्श्वभूमीवर सार्वजनिक दसरा महोत्सव समितीच्या विद्यमान कार्यकारिणीऐवजी नवीन कार्यकारिणी गठित करून महोत्सवाच्या आयोजनाची जबाबदारी सोपविण्याबाबत धर्मादाय आयुक्त कार्यालयाला सूचना देण्यात याव्यात, अशी विनंतीही उपविभागीय अधिकारी समाधान घुटुकडे आणि तहसीलदार श्रीकांत भुजबळ यांनी जिल्हाधिकारी राहुल गुप्ता यांच्याकडे केली आहे.
महत्त्वाचे मुद्दे
विशेष सखोल मतदार यादी पुनरिक्षणामुळे महसूल यंत्रणा पूर्णपणे व्यस्त.
हिंगोली तालुक्यात ९५ ग्रामपंचायत निवडणुकांची तयारी सुरू.
संभाव्य जिल्हा परिषद व पंचायत समिती निवडणुकांचीही शक्यता.
सार्वजनिक दसरा महोत्सव २०२६ साजरा करणे शक्य नसल्याचे प्रशासनाचे मत.
नवीन कार्यकारिणी गठित करून महोत्सव आयोजित करण्याबाबत धर्मादाय आयुक्त कार्यालयाला सूचना देण्याची मागणी.
إرسال تعليق