शंकरराव जाधव यांची पोलीस उपनिरीक्षकपदी निवड
३४ वर्षांच्या प्रदीर्घ सेवेला मिळाला सन्मान; ३२० रिवार्डसह हिंगोली जिल्ह्यातील १३ पोलीस ठाण्यांत उल्लेखनीय कामगिरी
महाराष्ट्र 24 न्यूज नेटवर्क
११ सप्टेंबर 2026
हिंगोली : हिंगोली पोलीस दलात गेल्या ३४ वर्षांपासून प्रामाणिकपणे व कर्तव्यनिष्ठेने सेवा बजावणारे शंकरराव जाधव यांची पोलीस उपनिरीक्षकपदी निवड करण्यात आली आहे. त्यांच्या प्रदीर्घ पोलीस सेवेत केलेल्या उल्लेखनीय कामगिरीची दखल घेत गृह विभागाकडून त्यांची पोलीस उपनिरीक्षकपदी निवड करण्यात आली. त्यांच्या या निवडीमुळे पोलीस दलातील सहकारी तसेच नागरिकांकडून त्यांचे अभिनंदन करण्यात येत आहे.
शंकरराव जाधव यांनी आपल्या ३४ वर्षांच्या प्रदीर्घ पोलीस सेवेत विविध जबाबदाऱ्या समर्थपणे पार पाडल्या आहेत. सेवाकाळात त्यांच्या उल्लेखनीय कामगिरीबद्दल त्यांना तब्बल ३२० रिवार्ड मिळाले आहेत. तसेच त्यांनी सीआयडीमध्ये सुमारे १० वर्षे, तर एलसीपीमध्ये दोन वर्षे सेवा बजावली आहे. हिंगोली जिल्ह्यातील १३ही पोलीस ठाण्यांमध्ये काम करताना त्यांनी उत्कृष्ट कामगिरीची छाप उमटवली आहे.
कठीण परिस्थितीतही कर्तव्याला प्राधान्य देत तपास, कायदा-सुव्यवस्था आणि नागरिकांशी समन्वय राखण्याचे काम त्यांनी सातत्याने केले. त्यांच्या कार्यतत्परतेची आणि अनुभवाची पोलीस विभागाने दखल घेत त्यांना पोलीस उपनिरीक्षकपदाची संधी दिली आहे.
पोलीस उपनिरीक्षकपदी निवड झाल्यानंतर प्रतिक्रिया व्यक्त करताना शंकरराव जाधव यांनी, “पोलीस दलात कार्यरत असताना कोणत्याही गोरगरीब व्यक्तीवर अन्याय होऊ देणार नाही. जनतेची सेवा आणि नागरिकांना न्याय मिळवून देणे हेच माझे प्रमुख ध्येय राहील,” असा निर्धार व्यक्त केला.
दरम्यान, त्यांच्या निवडीबद्दल हिंगोली ग्रामीण पोलीस ठाणे येथे सत्कार समारंभाचे आयोजन करण्यात आले. यावेळी पोलीस अधीक्षक श्रनिक लोढा, पोलीस निरीक्षक विष्णुकांत गुट्टे, पोलीस उपनिरीक्षक राहुल घुले आणि पोलीस उपनिरीक्षक श्रीदेवी वाघे यांनी शंकरराव जाधव यांचा शाल व श्रीफळ देऊन सत्कार केला.
यावेळी उपस्थित अधिकारी व कर्मचाऱ्यांनी त्यांच्या प्रदीर्घ सेवाकाळातील कार्याचा गौरव करत पोलीस उपनिरीक्षकपदी झालेल्या निवडीबद्दल शुभेच्छा दिल्या. त्यांच्या अनुभवाचा आणि कार्यक्षमतेचा फायदा पोलीस विभागाला तसेच सर्वसामान्य नागरिकांना निश्चितच होईल, असा विश्वास यावेळी व्यक्त करण्यात आला.
३४ वर्षांची प्रदीर्घ सेवा, ३२० रिवार्ड आणि हिंगोली जिल्ह्यातील विविध पोलीस ठाण्यांमध्ये केलेली उल्लेखनीय कामगिरी यामुळे शंकरराव जाधव यांची पोलीस उपनिरीक्षकपदी झालेली निवड ही त्यांच्या कर्तव्यनिष्ठ सेवेचा सन्मान मानली जात आहे.
टिप्पणी पोस्ट करा