ग्रामीण पोलीस स्टेशन हद्दीत डीजेमुक्त गणेश विसर्जन; ४६ गावांत चोख पोलीस बंदोबस्त
पोलीस निरीक्षक विष्णुकांत गुट्टे
महाराष्ट्र 24 न्यूज नेटवर्क
26 सप्टेंबर 2026
हिंगोली ग्रामीण पोलीस स्टेशन हद्दीतील ४६ गावांत गणेश विसर्जनाचा उत्सव शांततेत आणि डीजेमुक्त वातावरणात पार पडला. यंदा ग्रामीण पोलीस स्टेशनच्या हद्दीत एकूण ११० गणेश मूर्तींची स्थापना करण्यात आली होती. गणेशोत्सवाच्या दहा दिवसांच्या कालावधीत पोलिसांनी चोख बंदोबस्त ठेवत उत्सव शांततेत पार पाडण्यासाठी विशेष नियोजन केले होते.
पोलीस अधीक्षक श्रनिक लोढा यांच्या आदेशानुसार तसेच पोलीस निरीक्षक विष्णुकांत गुट्टे यांच्या मार्गदर्शनाखाली ४६ गावांमध्ये पोलिसांचा बंदोबस्त तैनात करण्यात आला होता. गणेशोत्सवाच्या दहा दिवसांच्या कालावधीत कायदा व सुव्यवस्था अबाधित राहावी, यासाठी पोलीस यंत्रणेने विशेष खबरदारी घेतली.
या बंदोबस्तासाठी ५ पोलीस अधिकारी, ३० पोलीस कर्मचारी आणि ३५ होमगार्ड यांची नियुक्ती करण्यात आली होती. पोलीस उपनिरीक्षक राहुल घुले, श्रीदेवी वगे यांच्यासह पोलीस अधिकारी, कर्मचारी आणि होमगार्ड यांनी विविध गावांमध्ये बंदोबस्ताची जबाबदारी सांभाळली.
गणेश विसर्जनाच्या दिवशी गावागावांत नागरिकांनी पारंपरिक पद्धतीने गणेशमूर्तींचे विसर्जन केले. विशेष म्हणजे यंदाचा गणेशोत्सव डीजेमुक्त राहिल्याने मोठ्या आवाजामुळे निर्माण होणारे ध्वनिप्रदूषण आणि त्याचा नागरिकांच्या आरोग्यावर होणारा परिणाम टाळण्यास मदत झाली. तसेच मोठ्या आवाजातील डीजेमुळे निर्माण होणाऱ्या गर्दीचे नियंत्रण आणि कायदा-सुव्यवस्था राखताना पोलिसांवर येणारा अतिरिक्त ताणही कमी झाला.
डीजेमुक्त गणेश विसर्जनामुळे विसर्जन मिरवणुका तुलनेने शांततेत पार पडल्या. नागरिकांनीही पोलिसांना सहकार्य करत शांतता आणि सुव्यवस्था राखण्यास हातभार लावला.
याबाबत महाराष्ट्र24 शी बोलताना पोलीस निरीक्षक विष्णुकांत गुट्टे यांनी सांगितले की, दहा दिवसांच्या गणेशोत्सव काळात ४६ गावांमध्ये पोलिसांचा बंदोबस्त तैनात करण्यात आला होता. नागरिकांनी पोलिसांना सहकार्य केले असून डीजेमुक्त विसर्जनामुळे पोलिसांवरील ताण कमी झाला. तसेच ध्वनिप्रदूषण कमी झाल्याने नागरिकांच्या आरोग्याच्या दृष्टीनेही हा उपक्रम महत्त्वपूर्ण ठरला.
गणेशोत्सव शांततेत पार पडण्यासाठी पोलीस प्रशासनाने केलेले नियोजन, अधिकारी-कर्मचारी व होमगार्ड यांचा बंदोबस्त आणि नागरिकांनी दिलेले सहकार्य यामुळे ग्रामीण पोलीस स्टेशन हद्दीतील ४६ गावांमध्ये गणेश विसर्जनाचा सोहळा शांततेत आणि डीजेमुक्त वातावरणात पार पडला.
टिप्पणी पोस्ट करा